السلام عليكم ورحمه الله وبركاته
قصيده اعجبتني فنقلتها لكم
اتمنى ان تنال على اعجابكم واستحسانكم
\\
\
ثلاث سنين انا اخطط لهذا اليوم يا ابو سعود
تيسر حالي وجاهز اوفي وعدي بوقته
وفجاه جتني تتعذر تقول اتاخرت الوعود
وانا مستغرب واسمع كاني وعدها خنته
حسبت انها تمازحني وتتصنع جفا وصدود
ضحكت بوجهها من قلب مع انها بايخه النكته
وقالت ارضى بالواقع قلبي ماهو المعهود
تغير كل شي صوبك نصيبي ما اظن انت
كنت في يوم محبوبي لكن ما اظن نعود
وصل من قبل ما توصل وانا ذاك الصبر عفته
ولكن تكفى صدقني ويشهد ربي المعبود
ترى ما خنتك بغفله ولا كلمته وشفته
صراحه اهلي قالوله بإنه ولد اصل وجود
وجتني امه بالصوره وبكلمات المدح اخته
سكت وقلت هي فرصه مدام الجود في الموجود
وقالوا كل من حولي علامات الرضا سكته
وانا فكرت دام امه واخته ماعليهم زود
اكيد اني براضيهم اذا وافقت واخترته
و أراضي اهلي واخواني مدام ان الفرح مقصود
عطيت الناس انا كلمه ومعاهم وقتي حددته
ولا اقدر اغيرها ترى عند العرب منقود
اوافق واعتذر باكر واقول الراي غيرته
تبي تشرحلي المنقود تصدق عاد يابو سعود
تبيني اقتنع وارضى بحال عمري ما عشته
انا ماني بقايلها عسى يفرش ثراها ورود
بعد ما حطمت قلبي وطعم الموت جربته
عسى بفستانها اشواك وفي ثوبه عقارب سود
ونار تحرق الكوشه وتحرق بيتهم حتى
وموت بليلة الدخله يبرد حرتي يا كود
ولا احس انها بحضنه يلامس خد لامسته
علي اهون اذا ماتوا ولا بنفس السرير رقود
ترى صعب علي اتخيل اللي ما تخيلته
عسى قاع الثرى يقسى ويتحول صخر جلمود
وحفار القبر يرفض يسوي فوق مااقدرته
ترى دفنت عديم الذات تلوع حتى كبد الدود
ومن خان العهود ومات تعافه حتى مقبرته
عسى ربي يجازيهم بحبل من مسد ممدود
يعلقهم من اطرافه وفوقه نار وتحته
انا ماني حقود وشين ولاني من نسل نمرود
ومن حط نفسه بوضعي بيقول اللي انا قلته
مدام الفعل له ردت فعل ولله ابشري بردود
بادعي دامني حي وباغرس للدعا نبته
وباسقيها نزيف القلب ودمع مارحم الخدود
وتكبر والثمر ثاري من اللي خانني وصنته
انا نذر علي اكتب وافجر هالقصيد رعود
واسمع كل بشر صوتي عجبته والا زعلته
واردد للي يسمعني اذا حبيت حط حدود
انا حبيت دون حدود وشوف اللي تكبدته
ثلاث سنين وانا ابني وجت صوره بكل ابرود
خذت مني شقى عمري وحلم قلت حققته
ثلاث اسنين وانا اخطط لهذا اليوم يابو سعود
وتوافق من كلام اخته وصوره اربعه في سته
said:
من المملكة العربية السعودية